Русија зазема уште две области во Бахмут!

Руското Министерство за одбрана денеска соопшти дека руските сили зазеле повеќе територии во Бахмут, додека продолжуваат со обидите да преземат целосна контрола над градот.

Битката за Бахмут се претвори во една од најкрвавите во 14-месечната војна, при што градот во источна Украина е речиси целосно уништен од артилериско гранатирање и улични борби.

Русија наведува дека заземањето на Бахмут ќе и’ овозможи да продолжи со офанзивата на истокот на Украина. Доколку бидат успешни, руските трупи веројатно ќе се соочат со уште поурбани битки за блиските градови Краматорск и Славјанск.

– Во правец на Доњецк, напаѓачки тимови ослободија две области во западните делови на Бахмут во изминатите 24 часа – изјави портпаролот на министерството Игор Конашенков, пренесува ТАС.

Тој, исто така, изјави дека во северните и јужните делови на градот, руските воздухопловни единици обезбедиле засилување на јуришните тимови.

Руското Министерство за одбрана објави дека војниците обезбедиле уште два блока во западните области на Бахмут и дека воздухопловните единици обезбедуваат засилување на север и југ.