Бастианини сака да вози во Херез

Возачот на Дукати, Енеа Бастианини, ќе се обиде да вози на четвртата трка од сезоната во Мото ГП шампионатот, Големата награда на Шпанија. Во четврток ќе биде познато дали ќе добие дозвола да вози на патеката „Анхел Нието“.

Бастианини се здоби со скршеница на скапулата на првата спринтерска трка сезонава во Португалија, кога Лука Марини од тимот VR46 го исфрли од патеката. Оттогаш Бастианини ја пропушти првата трка од сезоната, како и следните два тркачки викенди, во Аргентина и САД.

Италијанскиот мотоциклист на почетокот на оваа недела извозе десетина кругови на своето Дукати на патеката „Марко Симончели“, што го убеди дека може да вози во Херез.

За да се случи тоа, Бастианини прво ќе треба да помине лекарски преглед за да добие дозвола да биде на патеката од петок.