РУСКИОТ СВЕТ СЕ ШИРИ – Масакри, фарми од тролови и злато: Еве го новото руско бојно поле, цел континент се плаши од злогласните “Вагнеровци” !?

Западните власти велат дека Пригожин и неговите компании планираат да го прошират своето влијание во повеќе од десетина африкански земји. Често на сметка на исплашената Франција

Руски бизнисмен за кој се верува дека е близок соработник на Евгениј Пригожин, основач на Вагнер групацијата, е пренесен во болница во Централноафриканската Република по „обид за атентат“, објави новинската агенција РИА Новости, повикувајќи се на локалната руска амбасада. Руската амбасада во Банги се уште не ги коментираше околностите на наводниот обид за атентат.

Дмитриј Сити, кој официјално работи како шеф на културниот центар на Руската куќа во главниот град на Централноафриканската Република, Банги, беше санкциониран од САД во септември 2020 година поради неговите наводни врски со Вагнер групата, приватна воена група која распореди повеќе од 1.000 борци во таа нестабилна африканска земја.

Пригожин, рускиот олигарх под американски санкции, кој го предводеше неодамнешното туркање на Русија во Африка, во изјавата рече дека Сити добил пакет со експлозив што експлодирал во неговите раце, пишува Гардијан.

„Во овој момент животот на Дмитриј Сити виси на конец. Руските лекари во Банги прават се што е можно за да го спасат“, рече Пригожин во изјавата објавена од неговата угостителска компанија Конкорд.

Но, Пригожин, без да обезбеди никакви докази, тврди дека нападот бил координиран од Франција.

„Веќе контактирав со Министерството за надворешни работи на Руската Федерација за да покренат постапка за прогласување на Франција за држава спонзор на тероризмот, како и да се спроведат темелни истраги за терористичките методи на Франција и нејзините западни сојузници – како што е Соединетите Американски Држави“, изјави основачот на групата Вагнер.

Во соопштението, француското Министерство за надворешни работи негираше каква било вмешаност.

Вагнер се шири во Африка

Западните власти велат дека Пригожин и неговите компании планираат да го прошират своето влијание во повеќе од десет африкански земји во име на Русија. Често на штета на Франција.

Откако претседателот на Централноафриканската Република Фаустин-Аршанж Туадера одлучи да го ангажира Вагнер да се бори против бунтовниците во 2018 година, Париз се бори да го задржи своето влијание во Централноафриканската Република, поранешна француска колонија. Но, последните француски војници ја напуштија земјата пред неколку дена. Франција загуби и од Русија во Мали, каде што борците на Вагнер сега се борат против џихадистите.

Пригожин веќе неколку пати го обвини Западот за експлоатација на Африка. Гардијан тврди дека користи прикриени методи. Фарма на тролови поврзана со Пригожин е обвинета за водење кампањи за дезинформации кои го напаѓаат Западот и го подготвуваат јавното мислење за руски интервенции. Барем во една прилика, пишува Гардијан, беше откриено дека оперативците на Вагнер фалсификувале докази за француските злосторства.

Во Мали и Централноафриканската Република, на групата Вагнер и беа исплатени во готово и концесии за ископување злато и дијаманти. Десетици компании поврзани со Пригожин и неговите подредени се вклучени во екстракција на благородни метали и скапоцени камења низ Западна, Централна и Источна Африка.

Вознемирувачко откритие

При наметнувањето санкции на Сити во 2020 година, Американците тврдеа дека тој е основач на рударската компанија Лобаје Инвест поврзана со Пригожин, која работи во Централноафриканската Република. Договорот со суданскиот режим за екстракција и извоз на злато, исто така, се верува дека се покажал многу профитабилен.

Минатата година, работната група на ОН рече дека е „длабоко вознемирена“ од врските меѓу руските платеници, Лобаје и наводните прекршувања на човековите права во Централноафриканската Република, вклучувајќи масовни егзекуции, произволно притворање, тортура за време на испрашување и принудно раселување на цивили.

Понатаму, САД ја обвинија Русија за експлоатација на природните ресурси во Централноафриканската Република, како и голем број други африкански земји, за да помогне во финансирањето на војната на Москва во Украина. Москва ги отфрли обвинувањата.

Масакри во Мали

Има грст извештаи и докази за руски масакри и грабежи ширум континентот, пишува Гардијан.

Регистрирани се серија крвави напади на мини во пограничните зони меѓу Судан и Централноафриканската Република (каде владее беззаконието), а Гардијан ги објави пред неколку месеци. Се верува дека групата Вагнер ги ограбила рудниците за злато таму.

Сведоците со кои разговараше Гардијан ги опишаа масакрите извршени од платениците на Вагнер. Според сведоци, тие пукале неселективно од автоматско оружје, кршеле опрема, уништувале згради и краделе мотори. Еден спомна и гроб во кој имало повеќе од 20 жртви. Други зборуваа за стотици загинати или повредени.

И загрижениот гански претседател Нана Акуфо-Адо во четвртокот рече дека соседна Буркина Фасо „постигнала договор“ со Вагнер.

„Буркина Фасо сега склучи договор да соработува со Мали при вработувањето на тамошните сили на Вагнер и верувам дека на Русите им беше даден рудник во јужниот дел на Буркина како благодарност за нивната услуга. За нас во Гана, Фактот дека тие дејствуваат на нашата северна граница е особено вознемирувачки“, рече претседателот на Гана.

Гардијан тврди дека групата на Вагнер е исто така поврзана со злосторства во Мали, каде што нејзините борци наводно биле вклучени во масакрот на стотици цивили претходно оваа година.