Танер: Мораме да се подготвиме за прекини на струја во Австрија и Европа

– Австриската министерка за одбрана Клаудија Танер предупреди на голема веројатност за недостиг на електрична енергија во делови од ЕУ во блиска иднина и порача дека е потребно да се подготват за тоа.

Во интервју за германски „Велт“, Танер вели дека очекува дека наскоро ќе има големи прекини во снабдувањето со електрична енергија во ЕУ.

– Не е прашањето дали, прашањето е кога ќе дојде до тоа, рече Танер, додавајќи дека ризикот од прекин на електричната енергија значително се зголемил поради војната во Украина.

Таа рече дека хакерските напади врз снабдувањето со електрична енергија во Европа се средство за хибридно војување за рускиот претседател Владимир Путин.

– Не треба да се преправаме дека тоа е само теорија. Мораме да се подготвиме за прекини на струја во Австрија и Европа, објасни Танер и додаде дека една третина од австриското население може да преживее без струја најмногу четири дена.

Таа најави дека поради тоа армијата до 2025 година ќе постави 100 самоодржливи касарни, кои ќе се снабдуваат со електрична енергија.

Додаде дека освен тоа треба да постојат и таканаречени безбедносни острови, кои во итни случаи можат да бидат контактни точки за цивилни помагачи и службеници за спроведување на законот.