Британската кралица за здравјето на сопругот: Добро е, но не ги следи советите

Британската кралица Камила проговори за здравјето на својот сопруг, кралот Чарлс Трети, кому претходно оваа година му беше дијагностициран рак. Таа откри и што ја лути.

Кралицата Камила присуствуваше на настан за промовирање на читањето во палатата Хемптон Корт во саботата. Таа во оваа пригода проговори за својот сопруг, британскиот крал Чарлс, пренесува „Н1“.

Таа во разговор со познатиот писател Ли Чајлд рекла дека кралот е добро, но дека не мирува и дека не ги следи советите. Писателот одговорил дека, според него, кралот се однесува како типичен маж, пренесува „Скај њуз“.

75-годишниот крал неодамна им се врати на кралските должности откога Бакингемската палата на почетокот на февруари објави дека му бил дијагностициран рак додека бил на третман за зголемена простата. Тие не открија детали за видот на ракот или фазата на болеста.

Инаку, оваа година е многу тешка за британското кралско семејство. Не само кралот има здравствени проблеми, туку и принцезата од Велс, идната кралица, на која исто така ѝ беше дијагностициран рак по операција на абдоменот.