Јужноамериканските лидери го поздравија новоизбраниот претседател на Бразил

Лидерите на земјите од Латинска Америка синоќа во Бразил се сретнаа со новиот претседател на земјата, Луис Инасио Лула да Силва, честитајќи му ја функцијата и изразувајќи надеж дека Бразил ќе преземе поголема улога на меѓународната сцена.

Вчерашниот беше прв работен ден на Лула на функцијата, откако на 1 јануари свечено ја презеде должноста претседател.

Претходникот на Лула и жесток политички противник, Жаир Болсонаро, кој не присуствуваше на инаугурацијата, ретко патуваше во странство и ретко ги примаше шефовите на другите држави во посета и стануваше се поизолиран.

Новиот претседател на Бразил се сретна со претседателите на Аргентина, Алберто Фернандез, на Боливија, Луис Арсе, на Еквадор, Гиљермо Ласа, на Чиле, Габриел Бориќ и на Колумбија, Густаво Петро.

На инаугурацијата на Лула во Бразилија одржана ден претходно присуствуваа и други јужноамерикански лидери, а меѓу нив беше и претседателот на Уругвај, Луис Алберто Лакале По.

Лула синоќа се сретна и со Ванг Чишан, потпретседателот на Кина која е убедливо најголем увозник на бразилска стока, како и со претседателот на Ангола и со претставници на властите на Куба, Венецуела и Перу.