Келиф по златото порача: „Ме мразат, а не знам зошто, јас сум силна жена!“

Алжирката Имане Келиф (25) испрати порака до јавноста откако на Олимписките игри во Париз ја освои титулата олимписки шампион во бокс во категоријата до 66 килограми.

„Јас сум силна жена. Жена со посебна сила. Жена како и секоја друга. Јас сум родена како жена и живеам како жена. Фала му на Бога, ова е мојот одговор. Ова злато е одговорот на сите кои беа против мене“, изјави златната Келиф откако во финалето со едногласна одлука на судиите ја совлада актуелната светска шампионка од Кина, Лу Јанг (32).

Настапот на Келиф на почетокот на Игрите крена голема прашина поради нејзиното покачено ниво на тестостерон. Тоа предизвика бурни реакции ширум светот.

„Се што е кажано на социјалните мрежи е неморално. Сакам да го сменам размислувањето на луѓето ширум светот. Од 2018 година се натпреварувам под ингеренции на ИБА, знаат се за мене, но јас не ја признавам оваа ИБА. Некои членови ме мразат, не знам зошто. Денеска им испратив порака дека мојата чест е над се“, изјави Келиф, првата Алжирка која освоила златен олимписки медал во бокс.