Во Скопје се одржа екипното првенство на Македонија во билијард

Викендов во Скопје се одржа Екипното првенство на Македонија во билијард, на кое настапија 21 тим, при што во секој од нив според пропозициите имаше по тројца регистрирани играчи.

Победници се „Лонгони“ од Битола, кои во финалето го совладаа „Гран клуб“ од Скопје. Третите места им припаднаа на поразените екипи во полуфиналните дуели „Голден бол“ од Тетово и „Пауер бол“ од Струмица.

Со ова, шампионот во поединечна конкуренција, Христо Василевски, кој е член на „Лонгони“ успеа да ги обедини титулите и со „двојна круна“ да ја заврши сезоната.

Младинецот Андреј Ѓурчиновски кој има само 13 години беше негов најголем ривал поединечно и на крајот од сезоната обајцата имаа ист број поени, поради што за прв пат во историјата на државните првенства се играше „мајсторка“ која одлучуваше за титулата.

Илија Димоски од Битола за прв пат стана младински првак во билијард.

На крајот од сезоната беа прогласени и најдобрите од Б-дизвизијата, при што четирите првопласирани предводени од Златко Ицановски идната сезона ќе се натпреваруваат во А-дивизијата.