Гутереш во Давос предупреди дека светот е во жалосна состојба

Генералниот секретар на ОН, Антонио Гутереш, на Светскиот економски форум во швајцарскиот град Давос порача дека светот е во жалосна состојба поради големиот број меѓусебно поврзани предизвици, вклучувајќи ги климатските промени и војната во Украина.

Генералниот секретар на Обединетите нации (ОН), Антонио Гутереш, на Светскиот економски форум (WEF) во швајцарскиот град Давос порача дека светот е во жалосна состојба поради големиот број меѓусебно поврзани предизвици, вклучувајќи ги климатските промени и војната во Украина.

Тој смета дека предизвиците се трупаат како автомобили во верижен судир.

Гутереш ја пренесе својата порака на вториот ден од елитниот собир на светски лидери и корпоративни директори во швајцарскиот ски-центар Давос.

Откако ги добија вестите за хеликоптерската несреќа во Украина во која загинаа најмалку 18 лица, меѓу кои и министерот за внатрешни работи на Украина и други официјални лица, претседателот на Форумот, Борге Бренде, побара 15 секунди молк.

Првата дама на Украина, Олена Зеленска, ги бришеше солзите, велејќи дека тоа е еден многу тажен ден, а потоа им порача на присутните дека може и оваа негативна ситуација да ја сменат на подобро.

Гутереш изјави дека најголемото ниво на геополитичка поделба и недовербата во генерациите ги поткопуваат напорите за решавање на глобалните проблеми, кои, исто така, вклучуваат сѐ поголема нееднаквост, криза со трошоците за живот предизвикана со наглата инфлација и енергетската криза, долготрајните последици од пандемијата на Ковид-19, нарушување во ланецот на набавка итн.

Тој ги издвои климатските промени како „егзистенцијален предизвик“.

Вториот ден, владините официјални лица, корпоративните титани, академици и активисти присуствуваа на десетина панел-сесии.

Украина го зазеде централното место со приближувањето на годишнината од војната, а Зеленска врши притисок на присутните да сторат повеќе за да ѝ помогнат на нејзината земја во време кога руската инвазија остава деца да умираат, а светот се бори со недостиг на храна.

Германската Влада се соочи со зголемен притисок да направи уште еден значаен чекор напред во воената помош за Украина со тоа што се согласи да испорача главни борбени тенкови „Леопард 2“.

Гутереш не беше оптимист дека конфликтот, кој се води на помалку од 1.000 километри од Давос, може да заврши наскоро.

„Ќе има крај на оваа војна. Сè има свој крај. Но, не гледам крај на војната во блиска иднина“, рече Гутереш.

Тој смета дека длабоките историски разлики меѓу Русија и Украина го отежнуваат изнаоѓањето решение засновано на меѓународното право кое го почитува територијалниот интегритет.

„Во овој момент, мислам дека немаме шанса да промовираме или да посредуваме во сериозни преговори за постигнување мир во краток рок“, додаде Гутереш.