Пике суспендиран, му се заканувал на судија

Џерар Пике доби двомесечна суспензија откако вербално му се заканил на судијата по натпреварот помеѓу Андора и Албасете.

Поранешниот играч на Барселона и репрезентацијата на Шпанија, денес косопственик на Андора, реагирал бурно по поразот на неговиот тим од 1:0, а судијата Алонсо де Ена Волф ги внесе неговите навреди во официјалниот извештај.

Според арбитарот, Пике му рекол: „Движи се со придружба за никој да не те нападне“, како и: „Во друга земја би те претепале, но тука во Андора сме цивилизирани“.

Дисциплинската комисија на Шпанската федерација го казни за „јавно однесување што го нарушува спортското достоинство и углед“.

Во инцидентот биле вклучени и други членови на Андора – претседателот на клубот Феран Виласека беше суспендиран четири месеци, додека казна доби и спортскиот директор Хауме Ногес.

Андора моментално е на 10-то место во втората шпанска лига.

За време на својата кариера, Пике освои девет титули во шпанското првенство и три титули во Лигата на шампионите со Барселона, како и Светското и Европското првенство со шпанската репрезентација.

Foto/ Depositphotos