Додадете една лажица во смесата: Похуваното месо ќе биде крцкаво и нема да впива масло

Многумина се соочуваат со истиот проблем при подготовка на похувано месо – корката наместо крцкава станува мека, мрсна и натопена со масло. Но, според кулинарските експерти, решението е многу едноставно и се крие во една состојка што речиси секој ја има дома.

Станува збор за густин, односно пченкарен скроб, кој се додава директно во смесата со јајца.

Готвачите советуваат во две разматени јајца да се додаде една рамна лажица густин, заедно со малку сол и бибер. Смесата потоа добро се мати додека не стане целосно мазна, а се препорачува да отстои неколку минути за скробот малку да набабри.

Според експертите, токму густинoт создава тенок заштитен слој кога ќе дојде во контакт со врелото масло, што спречува маслото да навлезе во месото.

Резултатот е лесна и крцкава корка однадвор, додека месото останува меко и сочно одвнатре.

Овој трик со години се користи во азиските кујни, особено при подготовка на пржено пилешко месо, но сè повеќе луѓе го применуваат и кај класичните похувани шницли.

Постапката за похување останува речиси иста: месото најпрво се валка во брашно, потоа во смесата од јајца и густин, а на крај во лебни трошки.

Клучна улога има и температурата на маслото. Ако трошките не „зашушкаат“ веднаш кога ќе го допрат маслото, тавата не е доволно загреана. Во таков случај месото почнува да впива маснотија наместо веднаш да се формира крцкава корка.

Готвачите советуваат и да не се штеди масло при пржењето, бидејќи премалата количина може да доведе до нерамномерно пржење и омекнување на похуваното.

Уште една честа грешка се прави по вадењето на месото од тавата. Многумина веднаш го ставаат на хартиени салфетки, но така под корката се создава пареа која ја омекнува.

Подобро решение е месото да се остави на метална решетка или цедалка за воздухот да циркулира од сите страни. На тој начин корката останува крцкава дури и кога месото ќе се излади.

Овој трик одлично функционира и кај пилешко месо и риба. Кај рибата се препорачува да се користи помала количина густин – околу половина лажица – за корката да не стане претврда.

Многумина што ја пробале оваа метода велат дека по тоа повеќе никогаш не подготвуваат похувано месо без додаток на густин.